«Тӗп хулари пӗр кун» проект шайӗнче Пысӑк Енккассинчи вӑтам шкулта 9-мӗш класра вӗренекенсем Шупашкарти апат-ҫимӗҫпе коммерци техникумӗнче пулчӗҫ. Чи малтанах  ачасене Раҫҫӗй шайӗнчи Менделеев ячӗллӗ  олимпиадӑна  хутшӑннӑ Иван студентпа паллаштарчӗҫ. Вӑл вӗренекенсене  улма-ҫырлапа пахча ҫимӗҫри нитрат  шутне пӗлме пулӑшакан приборпа ӗҫлесе кӑтартрӗ. Унтан ачасем вӗренӳ  класӗнче йӗркеленӗ мастер классене хутшӑнчӗҫ.  Фёдоров Алексейпе Расколов Никита пицца хатӗрлесе курчӗҫ, вӗсемех чӗрӗ хӑяртан (карвинг мелӗпе) лили чечекӗ касса кӑларчӗҫ. Павлова Алина кекс хатӗрлерӗ. Афанасьева Ксенийӑпа Павлова Алина чустаран  лапша касрӗҫ.
     Тепӗр  пӳлӗмре вӗренекенсене Щипайкина Светлана Михайловна кӗтсе илчӗ. Вӑл тематика сӗтелне мӗнлерех илемлетмеллине тата приборсене епле хумаллине ӑнлантарчӗ. Ҫавӑн пекех салфеткӑсене тӗрлӗ енлӗ майласа хума вӗрентрӗ, ачасем ҫак ӗҫе кӑсӑклансах хутшӑнчӗҫ.
Щукина Светлана Михайловна патӗнче те вӗренекенсем активлӑх кӑтартрӗҫ. Масляева Маргарита, Мартынов Никон, Афанасьева Ксения, Фёдоров Алексей тӗрлӗ тӗслӗ  шӗвек тума хӑнӑхрӗҫ. Вӗсем маникюр тума вӗрентекен  илемлӗх салонӗнче, конфетпа торт хатӗрлекен  пӳлӗмре те пулса курчӗҫ.
      Техникумран тулли кӑмӑлпа тухрӗҫ 9-мӗш класра вӗренекенсем. Вӗренӳ учрежденийӗ тӗрлӗ енлӗ аталану пама пулӑшнине палӑртрӗҫ ачасем.
    Ҫак кунах ачасем К.В.Иванов ячӗллӗ драма театрӗнче «Юрлар-и, ташлар-и»  фольклорпа джаз кӗввипе спектакль-концерт пӑхрӗҫ. Театр артисчӗсем ҫав тери пуян, кӑмӑла ҫӗклекен ӗҫ хатӗрлеме пултарнӑ. Ачасене иртнӗ ӗмӗрти  чӑваш халӑхӗн вӑййинчен  пуҫласа  улах ларнине, салтака ӑсатнине, туй  йӑли - йӗркине кӑтартрӗҫ.  Йӑла - йӗркесене паянхи тапхӑрпа килӗшӳллӗ ҫыхӑнтарни  тӗлӗнтерчӗ те савӑнтарчӗ.  
      Тӗп хулари пӗр кун асра юлчӗ.